Pendidikan Mahal VS Kebodohan

Memasuki awal tahun ajaran baru ni banyak jeme tue pening palak mikirkah biaya sekolah anak-anaknye.Biaya masuk sekul saje sampai bejuta, lum lagi ndak merupuk i ranggian sekulah ( kitab, sepatu,tas dll ).Ye anehnye katenye sekolah gratis anye pungutan PSB katah besak e dan mberatkah, .Rupenye sekolah gratis cuma slogan,pemerintah lum serius nian ndak berlakukah sekolah gratis dan pemerintah dide tegas terhadap sekolah2 ye sekendak saje ngambik pungutan.Padahal banyak anak-anak ye pintar ye galak nian sekul dan punye potensi, cuma karne kondisi ekonomi dide mampu ade ye tepakse istirahat kudai sekul.

Bagi sebagian besar jeme kite ye berprofesi sebagai petani, tahun ini memang cukup berat.Rege komoditas pertanian seperti kawe, para, sahang dll sedang tughun sementare kebutuhan semakin banyak dan meningkat ditambah peregean naik gale.Tapi mpuk luk mane kina pendidikan anak harus tetap dipikirkah dan diprioritaskah kalu ndak merubah kehidupan anak kite njadi lebih baik njak di kite.kalu nak dipirkah memang berat tapi harus dipaksekah.

Memang masalah himpitan ekonomi njadi masalah klasik ye nyebabkah banyak jeme dide pacak sekul tinggi-tinggi.Oleh sebab itu bagi jeme tue memang harus merencanekah dan mempersiapkah biaya dan kebutuhan pendidikan anaknye di mase mendatang.Misale sejak dini lah mulai nabung atau ngikut asuransi pendidikan.Tiap bulan sisihkanlah duit untuk ditabungkah atau untuk mbayar premi asuransi, atau minimal setahun sekali pas musim kawe.

Bagi sebagian jeme mungkin berat untuk nyisihkan penghasilan untuk pendidikan anak apelagi ye bepenghasilan pas-pasan atau ndik bedie pekerjaan tetap.Bahkan ade ye sayang ngeluaghkah duit kalu untuk keperluan sekul anak.Kalu anak nuntut ndak mbeli buku atau ngikut les ngah bimbel selalu dihalangi, " Degelah pule les atau bimbel dan dide pule buku tu ndak lengkap nian, ye penting sekul " katenye.Lemaklah duit ye ade dibelikah tv,motor atau HP padahal sebenarnye lum begitu mendesak.Li ndak pandir tadi.Padahal biaya pandir tu mahal, kalu bemotor ndak dibelikah bensin, luk itu pule ame be HP ndak ngijekah pulsanye.Akhire kebutuhan sekul anak terbelangkai.Banyak jeme tue ye bependapat kah ndik ape banyak ige ngeluaghkah duit untuk pendidikan anak, lum tentu kele njadi jeme.Asak pacak mbace tulis jadilah.Memang kalu kite ndak ngajung anak pintar, calak dan banyak kepandaian perlu biaya tapi kele sebanding pule ngah hasil ye kah didapatkannye.Kalu anak kite pintar dan banyak keterampilan mudah ndapatkah kerje, dan pacak memanfaatkah peluang ye ade untuk menghasilkan duit.Cube kalu anak kite dikbedie ye menonjol,pintar lah dide bahkan pacak dikicikkah bange, kurang wawasan,dikbedie keahlian dan keterampilan kah luntang-lantung kulu kiligh tulah, akhirnye merepotkah dan njadi batan rupuk an jeme tue.

Pintar itu memang mahal tapi kalu bange lebih mahal dan lebih lame agi akibat ye harus kite nikmati. Mangke dari itu marilah kite jeme Kedurang, kite harus memprioritaskan pendidikan dan keterampilan untuk mase depan ye lebih baik.Gilah mpuk mahal tetap harus kite jalani.Harapannye semoga ading-ading ye masih nuntut ilmu pacak pule ngimbangi jeme tuenye.Belajaghlah iluk-iluk, behematlah dan belajaghlah nyisihkan duit belanje ye dinjukkah jeme tue.Mudah-mudahan kele Jeme Kedurang banyak ye meraih kesuksesan walau banyak halangan dan rintangan.Amiin

Bace selengkapnye......

Salam Ghindu

Lah lame dide nulis di blog ini, ghindu nian asenye.Selame ini ndak nulis di blog ini ade masalah, ade ye merubah passwordnye jadi dide pacak masuk ke dasbor.Anye Alhamdulillah mbak ini passwordnye lah balik agi. Kite gegale jeme Kedurang pacak agi bersilaturrahmi, berkomunikasi di blog ye kite cintai ini. Melah kite aktif lagi nulis sesuatu ye begune untuk kemajuan jeme kite.Dan rajin-rajinlah berayak ke blog ini.Mungkin ade informasi ye begune dan pacak ngubati ase ghindu ngah dusun laman bagi ye merantau jauh.

Adik sanak dudun laman jeme kedurang, ame ade informasi baik itu aguk iluk atawe aguk karut tolong diinformasikah di blog ini. Misale ame ade sanak kite ye ninggal , atau ade ye bekagukan, mangke kite saling keruani.

Bace selengkapnye......

Pentingnye keyakinan dan percaye diri dalam mencapai kesuksesan

Ade cerite Jeme Singapura ye mungkin pacak kite jadikah inspirasi atau panutan kite kalu ndak berhasil dalam mencapai cite-cite.Namenye Adam Khoo.Adam khoo punye empat buah bisnis ye omzetnye US$20 juta ( ame dirupiahkan sekitar 200-an milyar )di usienye masih 26 tahun. Padahal waktu berumur 12 taun banyak jeme ngicikkah die tu jeme malas,bigal dan dikbedie harapan kah njadi jeme.Waktu sekul di SD die dide nian merupuk'inye ndak belajagh,ame nginak kitab ( buku ) luk nginak tek kanyuk katah ghejie arunge die tu, apelagi kah mbacenye.Kerjenye main game ngah nonton TV.Pas nerime rapot nilainye abang gale .Waktu ndak masuk SMP die dide diterime di 6 sekolah,akhire kenan sekul di SMP ye paling karut kualitasnye.Di sekolah ye isie jeme bange gale tu kia Adam Khoo masih temasuk jeme ye paling bigal, die menduduki rangking 10 terakhir njak di 160 murid.Padahal Adam ngikuti les ngah privat, anye dide kina ndongkrak kemampuannye, masih jaban tulah.
Nginak anak'e luk itu pejadi Adam Khoo ngighim Adam ke Super Teen Program ye diajar ngah Ernest Wong.Kate Ernest Wong " Jeme tu pacak gale njadi jenius dan pacak pule njadi pemimpin mpuk awalnye die jeme ye paling bigal,bange,buyan sekalipun.Satu-satunye hal ye menghalangi kite ndik laine keyakinan kite ye salah udim tu sikap kite ye negatif."

Akhire Adam mulai beghubah, die mulai nanamkah keyakinan kalu jeme pacak dapat nilai A,die pacak pule.Adam mulai mbuat target dalam hidupnye.Target pertamenye luk mane mangke nilai rapotnye pacak A gale.Tamat SMP die ndak masuk ke Victoria Junior College ( SMA ye paling unggul di Singapura ),terus tamat SMA die ndak kuliah di Universitas Nasional Singapura dan njadi murid terbaik di situ.
Sate lah meghase yakin,Adam ngulang sekul agi ke SMP.Die mulai nempelkah kate-kate motivasi di buku,dinding kamar dan die mulai mbuat rencane hidupnye ke depan.Die merubah care belajaghnye selame ini.Waktu kantin-kantinnye betanye tuape die cite-citenye,Adam langsung njawab "tamat njak di SMP ini aku ndak masuk Victoria Junior College terus kuliah di Universitas Nasional Singapura dan dapat rangking 1 terus".Kantinnye tetawe," Dam jangan bemimpi kabah tu, tamatan SMP ini mane ade ye dapat SMA unggul apelagi dapat rangking 1".Mpuk ditawekah jeme Adam dide patah semangat, die semakin giat dan tambah besemangat.Dalam waktu tige bulan rate-rate nilainye naik njadi 70.Dalam setaun, njak di rangking paling bawah die pacak nduduki rangking 18. Dan waktu tamat SMP die dapat rangking 1 dengan NEM tertinggi dan dapat nilai A gale.Akhire die diterime di Victoria Junir College dan die berhasil pule kuliah di Universitas Nasional Singapura dan dapat juara 1 terus.

Nah luk mane mangke jeme ye tadinye tegalau ngah bigal,malas, dan selalu rangking terendah di kelas pacak njadi juara kelas dan dianggap jenius?
Sesuai tuape ye dikatekah Ernest Wong " ye menghambat kite dik laine keyakinan ye salah ngah sikap kite ye negatif ".Adam Khoo pacak sukses li karne :
1.Die merubah keyakinannye ye selame ini salah njadi keyakinan ye benagh (njak di keyakinan " Aku ni ditakdirkah njadi jeme bigal,ndik mungkin pacak dapat nilai A " njadi keyakinan " Kalu jeme lain pacak dapat nilai A, aku pacak pule ".
2.Die mulai nentukah tujuan hidup ye mantap. " Nilaiku harus A gale,aku ndak masuk Victoria Junior School,kuliah di Universitas Nasional Singapura, Aku harus rangking 1terus "
3.Die Ngicikkah tuape-tuape ye ndak dicapainye di depan jeme banyak.Kalu die dide pacak mbuktikah tuape ye dikicikkanye pastilah die maluan.Nah ini nambah semangat die untuk ncapai tujuannye.

Nah adik sanak sekalian, kite pacak pule menau Adam Khoo.Kite pacak berhasil mpuk kite banyak kekurangan dan keterbatasan.Kalu selame ini keyakinan kite salah kite harus merubah keyakinan kite tu njadi keyakinan ye benar secepatnye.Misale kalu selame ini kite ragu ndak mulai bisnis karne kite ade keyakinan :" Aku ni dikbedie jiwa bisnis,dide kah mungkin pacak berhasil dalam bebisnis ", ubahlah keyakinan tu njadi "Jeme pacak berhasil dalam bisnis, retinye aku pacak pule tinggal agi aku harus keruan lukmane care mangke pacak berhasil dengan banyak belajagh " dan mulailah bebisnis.Ade pule keyakinan " Aku ndik kah mungkin lulus tes CPNS, aku dikbedie duit, dikbedie sanak pejabat ".Ubahlah keyakinan itu njadi " Aku pacak lulus CPNS asak aku belajagh dan terus berusahe,duit ngah sanak pejabat bukanlah segalenye ye ndukung kelulusan CPNS".Atau ade pule keyakinan "Kami ni jeme pisak dik kah mungkin pacak sekul tinggi-tinggi ", ubahlah njadi " Mpuk aku pisak aku pasti pacak sekul tinggi-tinggi,asak aku galak berusahe dan tahan menderita", dan sebagainye.Ubahlah keyakinan-keyakinan kite ye salah selame ini.Kite ni ade gale potensi dan berhak untuk berhasil dalam segale hal,karne Allah nciptakah kite dengan sempurna.

Bace selengkapnye......

Bukaklah Usahe,Peluang Usahe Ade Dimane-mane

Kalu kite perhatikah sebagian besar jeme kite berprofesi sebagai petani.Ade ye bekebun kawe, bekebun nilam,bekebun coklat dan ye baru-baru ni bekebun para ( karet ) dan sawit.Ade pule ye besawah dan beume.Anye sayang nian jeme kite kurang pacak ngatur ( memanage) keuangannye dan belum banyak ye ekspansi ( perluasan bidang) usahe.Sanak kite ye bekebun kawe, panennye cuma setaun sekali ditambah buah selang.Menurut pengakuan bebeghape adik sanak ye bekebun kawe, setiap taun ade ye panen 2 ton, ade ye 3 ton dan ade pule bahkan sampai 4-5 ton lebih.Kalu kite ambik rate-rate peghulihannye 2 ton dengan rege 15.000 retinye penghasilan adik sanak kite tu rate-rate : 2000x15.000=Rp.30 juta setaun.Sebenarnye lumayan juge.Anye sayang nian dami lah udim musim, duit tadi dipendamkah saje di bank dan tiap bulan ditaguni,akhire kadang ceput sampai ke musim taun depan.Paling untuk nambah permakan tiap bulan ade ye ngojek dan ade pule ye upahan.Alangkah sedihnye,padahal duit tadi kalu diputar untuk usahe atau bisnis pacak ngenjuk penghasilan.Padahal sanak kite ye bekebun kawe kebanyakan lah nengah juge ade ye tinggal di kota Bengkulu, ade pule ye tinggal di kota Curup. Namenye tinggal di pasar banyak nian peluang usahe ye pacak ditekuni.
Peluang usahe sebenarnye ada dimane-mane. Cube perhatikah barang-barang ye ade disekitar kite misale, baju,sepatu,alat kosmetik,buku, computer,handphone dan tuape saje ye ade di sekeliling kite, sebagian besar merupekah hasil dari transaksi jual beli. Bahkan kadang-kadang kebutuhan pokok luk beghas,batan gulai dan ranggian dapugh kite dapatkah njak di transaksi jual beli .Sayangnye ngape kite cuma njadi pembeli bukan penjual.Masih jarang jeme kite ye njadi pedagang ape lagi skala besak.Padahal kegiatan ye paling banyak di dunie ini adalah kegiatan perdagangan atau jual beli.

Masalahnye, kadang kite takut ige ndak mbukak usahe atau bisnis.Kite nganggap kalu peluang usahe atau bisnis lah tetutup,lah diambik jeme gale jadi peluang ye ade kecik dan nakutkah kalu kite masuk kesitu. Padahal dunie ni terus beputar, peluangpun terus beputar. Bahkan banyak peluang ye lum dimanfaatkah jeme lain.
Misale usahe dibidang makanan mpuk lah banyak ye mbukak usahe itu anye masih tebukak peluang untuk ye baru ndak mulai, buktinye banyak pemain-pemain baru dan akhire sukses berusahe di bidang ini. Sayang di Bengkulu usahe ini didominasi jeme Padang,Jeme Jawe ngah Jeme Sunda.Luk itu pule usahe voucher HP sampai mbak kini terus tumbuh bekembang luk tighau di musim ujan, anye banyak ye betahan bahkan berhasil. Teknologi,Inovasi-inovasi dan kreasi baru bekembang terus, retinye masih banyak dan masih tebukak peluang untuk kite mulai bebisnis.

Kalu selame ini kite cuma njual kawe ke tokeh kawe ngape kalu kite saje ye njadi tokeh kawe.Padahal kalu dikekumpulkah banyak juge jeme kedurang ye bekebun di Bengko Curup kalu ade ye pacak menghimpun hasil kebun gegale jeme kite di situ alangkah lebih baiknye.Kalu selame ini kite njual kawe matah, cube kalu kite mbukak usahe “Kopi Bubuk”, tapi tentu saje harus berkualitas dan ade ciri khasnye.Kopi bubuk Semende ngah Pagar Alam itu lah sampai di ekspor ke luar negeri.Kopi Jeme Kedurang aseku pacak pule tekenal kele asak kite galak memulainye.Intinye kite harus nginak tuape saje peluang ye pacak dijadikah duit di lingkungan sekitar kite. Kadang usahe tu dide perlu mudal besak,bahkan ade ye dide bemudal ( mudal duit ) tapi cukup mudal otak ngah keahlian.Makelar misale dide perlu bemudal duit, cukup die banyak informasi sape-sape ye ndak bejual udim tu ncakagh sape-sape ye beminat mbeli, tinggal ngambik selisih rege untuk keuntungannye. Dan banyak contoh lainnye.

Kalu kite mpai dalam tahap bepikir-pikir atau mpai ngenginak peluang usahe ye pas untuk kite anye kite lum beghani mulainye, carenye gampang kite penau saje usahe jeme lain ye kire-kire masih bepotensi untuk dikembangkah. Tapi kite modifikasi mangke ade dikit perbedaannye.Kalu lah jalan usahe kite tadi mpai kite mbuat terobosan dan inovasi baru sesuai kreativitas kite mangke usahe kite bekembang.Nanti ame kite lah mbukak sutik usahe biasenye timbul ide-ide usahe lain, dan kite pacak ekspansi ( ngembangkah ) usahe kite.Atau kite kinak i tuape kepacakan kite,misale kalu ade ye pintar bemasak juadah atau kue die pacak mbukak usahe “toko kue”.Ame lum bedie badah atau toko, pacak pakai sistem nitip ke warung atau ke mini market atau kalu pacak ke Mall.Tapi tentu saje kualitasnye harus dijage.
Untuk Bengkulu ye masih bekembang ni masih banyak nian peluang usahe ye pacak kite ambik.Kinaklah dimane-mane perumahan atau real estate bemunculan.Sebenarnye itu peluang,pasti setiap ghumah tu perlu kebutuhan pokok sehari-hari.Kite pacak mbukak toko atau mini market di sekitar itu.Atau minimal mbukak usahe bedagang beghas, kerne pastilah tiap ghumah tu mengkonsumsi beghas tiap aghi.
Nah adik sanak sekalian Jeme Kedurang ye lum bedie kegiatan usahenye, melah kite mulai berusahe atau bebisnis njak di ye kecik kudai dan terus dikembangkah.Kalu kite gagal jangan kite nyerah kite cube bisnis lain sampai kite tetemu bisnis ye sesuai ngah kite.Melah kite mbukak mate kite mangke njegil juge dan pacakl nginak peluang usahe ye ade di sekitar kite.Mudah-mudahan kele adik sanak Jeme Kedurang pacak njadi pebisnis ye berhasil.Amiin.

Bace selengkapnye......

Sekalian Tuntumkah Dikit Sinyalnye

Pak Kirah mpai udim gajian.Die upahan nebas di kebun dengah sanaknye di Bingkuk "Bengko Curup ".Ghulihlah Pak kirah duit besak juge.Pesan bininye ame lah udim upahan belanju kudai ke dusun anye singgahi kudai anak buah ye sekul di STM Bengkulu.Pak Kirah pamitanlah ngah dengah sanaknye ngatekah die ndak belanju kudai ke dusun.Pak Kirah berangkat ke Bengkulu naik angkutan umum .Pas singgah makan siang di ghumah makan Pak Kirah nginak jeme bekicik sughang kadang sambil tetawe ( maklum jeme lagi nelpon pakai HP,dan pakai handsfree jadi dide kinakan luk nelpon ).Pikir Pak Kirah ni ngape jeme tu ngicik sughang.Kalu lah Gile.Anye ame gile ngape pelagakannye alap benagh, bebaju ngenceting katah rapie

Li kerne penasaran betanye lah Pak Kirah ngah jeme ye duduk pasi die." Oi sanak ngape jeme tu ngicik sughang, tetawe katah injik e pule,ape lah gile die tu?'tanye Pak Kirah."Oh... orang itu sedang berbicara dengan sahabatnya pakai handphone atau HP pak.Dia itu nggak gila"kate jeme tadi pakai base Indonesia, mungkin die tua aslie jeme Jakarta."O... mancanan saya gila,nggak taunya lagi nalipun ( maksudnye nelpon ).Kalu saya mau mbeli juga dimana saya bisa belinya pak, mangka saya ( maksudnye biar saya ) pacak menghubungi keluarga yang jauh-jauh" kate Pak Kirah cicak macak bebase Indonesia.Memang mpaini Pak Kirah pernah senampur tinggal di Jakarta njadi kenek bangunan, anye kenan dide tahan dan ngelipat agi ke dusun." Kalo bapak mau beli HP beli aja di Counter HP,nanti kalau bapak mampir ke Bengkulu, di sana banyak Counter HP."
Singkat cerite sesampainye di Bengkulu Pak Kirah singgah ke Counter HP "Cemara Celullar".
" Dek, aku ni ndak mbeli HP " kate Pak Kirah
" Merk apo pak, Nokia, Samsung, LG atau Sony ericson?"tanye pelayan toko
" nduk ai kah banyak pule merk HP ni, ye mane kinah, ye penting alap udimtu regenye murah"
Pelayan tadi ngambik HP ye regenye murah dan mbukak bungkusannye.Udim tu di bukaknye HP ndak masukkah SIM card nye.Pelayan tadi betanye
" Bapak bawak SIM card nyo idak ? "
" Ade, aku kan pernah ade motor jadi ade SIM.Ini die ame kaba ndak nginak." kate Pak Kirah
" Bukan SIM pak tapi SIM card, sejenis kartu untuk Handphone" kate pelayan toko.
" Oh...luk itu " Pak Kirah cecengih beghayik, maluan ketauan nian dide ngerti masalah HP.
" Ade dide jualan SIM kad tu di sini, ame ade sekalianlah " kate Pak Kirah
" Ado, Pak yang XL ajo yo".
" Au gilah ye mane saje"
" tapi ngomong-ngomong Bapak tinggal dimano ?" tanye pelayanan toko
" di Batu Ampar Kedurang "
" Yak Pak kalu belum ado sinyalnyo XL disitu "
" Kalu luk itu sekalianlah tuntumkah dikit sinyalnye,dide pule ndak banyak nian.Ame ade jaik sejaik jadilah " kate Pak Kirah degis-degis saking semangate
" Ha...." pelayan toko tadi bengong

Bace selengkapnye......

Arisan Ikatan Keluarga Kedurang di Bengkulu

Aghi sabtu tanggal 7 Februari 2009 kemaghi diadekah arisan Ikatan Keluarga Kedurang ( IKK )di Bengkulu bertempat di ghumah Bpk. Satarjo di Jalan Hibrida 2 No.32A Kelurahan Sidomulyo Kecamatan Gading Cempaka.Arisan IKK diadekah tanggal 7 tiap bulan ye gunenye untuk mempererat tali silaturrahmi diantare keluarge Kedurang ye ade di Bengkulu.Waktu arisan kemaghi datang tokoh dan sesepuh masyarakat Kedurang di Bengkulu diantarenye,Drs.Ahmad Nurdin,SH ( Pengacara sekaligus Ketua Yayasan Perlindungan Konsumen Indonesia Bengkulu ) , Drs.Yasran Abubakar ( Mantan Kepala RRI Bengkulu ), Drs. Terussudin ( Caleg PKPI ),Drs.Suhilman Mastofa ( Kabag Umum STAIN Bengkulu) , dan Wak Murad ( Mantan Kepala Dinas PU Kota Bengkulu.)

Dalam sambutannye mewakili Ketue IKK ( berhubung Ketue IKK Sapuan Dani,SH,M.Hum berhalangan hadir )Drs. Ahmad Nurdin,SH mengajak warge Kedurang di Bengkulu untuk kompak dan besatu pada saat pemilu tanggal 9 April 2009 kele, kite diajaknye untuk milih caleg jeme kite sak di Kedurang.Untuk caleg DPRD Propinsi udim berembug ngah Drs.Terussudin disepakati untuk mendukung Sapuan Dani,SH.M.Hum ( Caleg PKPI No.1 Dapil Kota Bengkulu ). Kate ninik Terus kite harus ndukung sughang saje sebab jumlah caleg DPRD Propinsi ye kah besaing memperebutkah kursi di DPRD Propinsi ade 140 ughang lebih.Sementare ye kah diambik sebanyak 7 ughang saje.Jadi berdasarkah mate pilih ye ade perlu suaghe sekitar 14 ribu mangke pacak duduk di DPRD Propinsi.Ame suaghe jeme Kedurang ye diperkirekah sekitar 2.500 tepecah kecik kemungkinan ade wakil jeme Kedurang ye pacak duduk di DPRD Propinsi.Jadi kate ninik Terus lebih kite ndukung sughang saje yaitu ninik Sapuan Dani karne die nomor urut 1.Sementare ninik Terus akan tetap bejuang mintak dukungan njak di Jeme luagh Kedurang seperti Semende ( kerne ninik Terus mpaini lame tugas di Semende Muara Enim ). Selain itu ade pule jeme kite ye ncalon anggota DPRD Kota Bengkulu.Di Dapil 3 Selebar ade Miftahul Jazim ( Caleg partai PMB no. urut 1 ), Gasman Hadi ( Caleg PPDI No.urut 1 ), Heriani, dan lain-lain.Cukup banyak jeme kite ye ncalon sak di Dapil Selebar lebih kurang tujuh ughang.Secare itung-itungan suaghe kalu ngandalkah suaghe njak di Jeme Kedurang saje kecik kemungkinan ade ye kah pacak duduk di DPRD Kota sak di Dapil ini.Anye mudah-mudahan caleg-caleg jeme kite tadi pacak merangkul jeme sak di luagh Kedurang.Jeme kite ye ncalon di Dapil 2 Gading Cempaka salah satunye Erdani Ibrahim,SH ( Caleg Partai Merdeka no.urut 2 ) dan di Dapil 1 Muara Bangkahulu ade Yuliswan,SH,MH ( Caleg Partai PPRN no.urut 1 ). Mudah-mudahan adelah jeme kite ye mewakili kite di DPRD Kota Bengkulu.Ninik Nurdin juge mempraktekkah care ncontreng surat suaghe.Ye diconteng nomor urut caleg bukan nconteng partainye.Dan contengannye jangan sampai keluagh kotak nomor urut sebab kalu sudut contengannye ngene ke nomor di bawahnye berarti nomor itu ye ndapatkah suaghe.Jadi ati-ati waktu nconteng.
Sementare Ninik Yasran menyoroti masalah Pilkada Bengkulu Selatan kemaghi.Menurutnye jeme kite selalu saje ade hambatan untuk maju.Sesuai ngah namenye " Kedurang" retie selalu " Dikeduk Ughang ".H.Hartawan,SH ye diharapkah pacak mewakili jeme kedurang, urung njadi Wakil Bupati Bengkulu Selatan karne Surat Njak di Mendagri netapkah Pilkada Ulang dan masih bepedoman ngah putusan MK.Udim tu kate ninik Yasran, Suarni Muhidin ( Pengusaha Sukses asal dusun Pagar Banyu Kedurang ) ye unggul dalam pemilihan Wakil Bupati Kaur lah teganjal pule pelantikannye , dikarnekah ade ye nggugat ke PTUN yaitu Mudarwan Yusuf,SH,MH.Mane pule Gubernur lum neruskah rekomendasi pelantikan Wapub Kaur tu ke Mendagri.Tapi kite harus besabar dan jangan betindak anarkis apelagi kah merusak, itulah pesan ninik Yasran.Mudah-mudahan nanti Allah memberikan kesempatan dan jalan bagi Jeme Kedurang mangke pacak pule maju.
Di penghujung acara tuan ghumah Bpk.Satarjo dimintak ngenalkah dighi berhubung die mpai pindak njak di Muara Enim.Dalam perkenalannye Bpk Satarjo nyampaikah rase terima kasihnye ngah adik sanak ye lah datang dalam arisan IKK di ghumahnye dan die ngaghapkah kegiatan arisan ini terus berlanjut dan anggotanye terus nambah.Bpk.Satarjo pindah ke Bengkulu akhir tahun 2008 mpaini dan die betugas di SDN 76 Kota Bengkulu.Sebelume sejak tahun 1982 sampai taun 2008 die betugas di Desa Tanjung Agung Kec.Tanjung Agung Kab.Muara Enim dan terakhir menjabat sebagai Kepale SDN 1 Tanjung Agung.
Setelah melalui pengundian ditentukah arisan IKK tanggal 7 bulan depan badahe di ghumah Rijaya,S.Pd ( Kepala SMPN 17 Bengkulu ) di jalan Padat Karya.Bagi adik sanak dusun laman ye belum ngikut arisan IKK ini boleh begabung untuk mempererat tali silaturrahmi diantare kite.

Bace selengkapnye......

Penyebab Jeme Dindak Belajagh

Mbak Kate pepatah " Kalau mau pintar ya belajar ".Memang kalu kite banyak belajagh kite banyak pengetahuan, dan wawasan kite betambah luas.Banyak jeme ye sedut belajagh, ade pule ye meghase dami lah udim nduduki bangku sekul jadilah pule.Padahal belajgh tu prosese seumur hidup kite.Sebagaimane sabda Rasulullah " Tuntutlah ilmu sejak di dalam buaian sampai liang lahat".Belajagh tu perlu mangke kite pacak mbawe diri menuju perubahan hidup ye jauh lebih baik.
Ade banyak alasan jeme ngguk atau sedut belajagh diantarenye :
1. Dide keruan manfaat belajagh
Jeme dindak atau sedut belajagh biasenye dide keruan tuape manfaat belajagh bagi hidupnye.Udim tu ndik bedie ye ndorong atau ngenjuk pemahaman ngape mangke harus belajagh,ndik ape belajagh,dan tuape ye harus dipelajaghi.Kalu kite banyak ilmu,banyak wawasan,banyak keterampilan ye kite ghulih sak di belajagh tentu saje kite mudah dalam segale hal.Mudah ncakagh batan penggawean,mudah mbuat usaha,mudah nyelesaikah segale persoalan dan pastilah kite "PEDE" bekekumpul ngah jeme.Ame kite serbu ndik keruan asenye pastilah kite jadi minder.

2. Dide keruan luk mane care belajagh
Ilmu pengetahuan pacak kite pelajaghi bemacam care antare lain :
a.Mbace buku ye bemanfaat ( jangan mbace novel atau komik tulah )
b.Ndengaghkah kaset,CD,MP3 ( mbakini kan lah banyak pelajaghan ye lah direkam pakai kaset)
c.Nonton CD,DVD ( ye ini lah banyak pule dibuat jeme,jadi ame kite malas mbace pacak pakai media ini )
d.Ngikuti kursus,training atau seminar (kerne ini care belajagh ye mudah difahami)
e.Belajagh sak di pengalaman.Kalu kite ngalami kegagalan berarti kite lah dapat satu pengetahuan.Kite harus ncubenye agi luk ape mangke berhasil.Luk mane kalu gagal agi? artinye kite dapat tambahan pengetahuan agi.Cube terus sampai berhasil.Kerne kalu kite gagal bukan kite ye salah tapi kejadiananye ye salah.Jadi jangan ragu untuk ngulanginye agi.
f. Banyak-banyak diskusi atau konsultasi ngah jeme ye lah ahli dan banyak pengetahuannye.

3.Meghase ndik perlu agi belajagh
Kadang-kadang jeme ni nganggap dide perlu agi belajagh ame lah udim duduk di bangku sekul atau umur lah tue jadilah pule belajagh.Ndik bedie gunenye agi belajagh katenye.Padahal ilmu pengetahuan ye kite pelajaghi pastilah ade gunenye kele.

4.Nganggap belajagh tu mahal
Kalu kite nganggap belajagh atau ndapatkah ilmu pengetahuan tu mahal bolehlah di cube kudai kebodohan atau miskin pengetahuan.Kele mangke keruan ternyate kalu kite miskin pengetahuan banyak nian ye harus kite tebus atau kite bayar karena kurangnye pengetahuan kite.Kalu kite kurang pengetahuan ( dimak pule ame dikicikkah bange ) pertame kite mudah ditipukah atau dibuhungi jeme,udimtu dide pacak nginak peluang atau kesempatan dalam kehidupan sehari-hari,dide pacak memanfaatkah peluang atau kesempatan njadi suatu keberhasilan/kesuksesan dan dide pacak ningkatkah derajat hidupnye.jadi ye mane ye lebih mahal belajagh atau "miskin pengetahuan"

Nah adik sanak sekalian ternyate penting nian belajagh tu untuk kehidupan kite ye lebih baik.Jadi mulai mbakini melah kite giat belajagh dan manfaatkah waktu sebaik-baiknye untuk belajagh.Dide perlu belajagh tu di bangku sekul nian.Dan jangan pule kerne umur lah tue kite ngguk agi belajagh.Tuape hal ye iluk dan ye bemanfaat ye ade di lingkungan kite melah kite pelajaghi.Mulailah njak di mbace,nginak,memperhatikah,betanye.Udim tu simpanlah dalam memori ingatan kite ye pacak kite pantau (panggil ) agi kebile kite perlukah.Manfaatkah sebaik-baiknye indera ye dinjukkah Allah ngah kite. Mate,Telinge,Otak,Hati,indera peghase pacak kite maksimalkah untuk belajagh.Mudah-mudahan jeme Kedurang kele pintar-pintar gale.

Bace selengkapnye......